دليل السائح في مرسي مطروح

نبدأ بالسفر
المواصلات على حسب
أحنا نفضل مطروح بالذات تبقى بعربية خاصة علشان كل يوم تروح شاطئ مختلف عن اللى قبلة لو عربية حديثة فول عربيتك وأطلع على طريق الضبعه لان أول بنزينة هتاقبلك هتبقى بعد 120 كيلو تقريبا
لو العربية قديمة وتقلق من أى فصل ممكن تعمله يبقى خد طريق العلمين أفضل
ولو أتوبيسات تقريبا له 7 مواعيد يوميا لشركات مختلفة وياخد فى الطريق حوالى 5 ساعات ونص
وفى القطر بس بيطول شوية حوالى 8 ساعات للى عاوز يستحمل بقى 😊
بس لو رايح بأتوبيس أو قطار يبقى الافضل تدور على مكان أقامة فى وسط البلد
فى مثلا فنادق القوات المسلحة هو مش فندق بالمفهوم بتاع شرم الشيخ والغردقة علشان بس اللى حاطط فى دماغه حاجة تانية
.. هو عبارة عن عماير وشقق اللى مش ع البحر ب ٨٥٠ الليلة وع البحر من غير تكييف ب ١٢٠٠ وب ١٥٠٠ بتكييف .. الشاطئ اصلا عام بس نضيف جدا جدا جدا وممكن تكلم بتاع الشماسى يقعدك فى مكان مميز والبحر هتاك فعلا يعتبر من احسن الاماكن في مرسى مطروح والمياه هادئة وجميلة جدا بس وفي كام مطعم ع البحر وسوبر ماركت وجنبه على طول فندق اسمه كارلوس تقريبا الليلة ب ٥٠٠٠ بالاكل والشرب

فى أكتر من فندق للقوات المسلحة فى اللى فى بساطة الابيض وفى وحد تانى اللى فى بدوي ومبارك جنب البوسيت رائع
اللى فى الابيض يعتبر بعيد عن وسط البلد بس فعلا من احسن شواطئ ف مطروح ( على فكرة معظم الشواطئ مميزه جدا ) إنما بدوي ومبارك جوه البلد والشاطئ خاص بمبلغ أقل وفيه حمام سباحة وعجل زي كمبوند واسع بليل تطلعه من بوابه تلاقوا كورنيش وتهيصوا
أما بقى الاقتراح التانى أنك تأجر شقق وأجمل مكان للأيجار فى رأينا شارع العوام"
لانه ببساطه يعتبر ال قلب وسط البلد و هيبقي جنبك اي حاجه تحتاجها
شفلك شقه ف شارع العوام و الاسعار متفاوته يعنى من اول 300 جنية لغاية 1200 على حسب النظافة والفيو بتاع البحر ماتاجرش بسرعه اتفرج ف عمارة و اتنين و تلاته و الانسب اسكن فيه ..
الكلام اللى جاى دة بقى للناس اللى رايحة مواصلات وخصوصا فى نزلات الشواطئ هتلاقى موقف قبل شارع أسكندرية ودة نقل عام بس المهم قبل ما تركب تعرف أخر ميعاد للرجوع علشان متتسوحش
أو الحل التانى ان تتفق مع ميكروباص تويوتا انه يوديك ويجيبك ( رينج الميكروباص من ٢٠٠ ل ٢٣٠ على حسب المسافة )
**معظم الشواطئ سهرها ثابت 4كراسي وشمسيه ٧٥جنيه الغرام ١٠٠ج ( بعد المعافره )
** ممكن تأجر يخت من عند شاطئ الغرام ب 400 جنية تقضى فيه اليوم
** البنانا بوت الربع ساعه ب 40 جنية
** شواطئ كليوباترا وعجيبة مكان مثالى للتصوير لازم يبقى معاك كاميرا ولبس نضيف كدة 😊 😊
** فى شاطئ أسمه اللجونه ودة قريب من الابيض هو مش مأهول أوى ويعتبر لسه موصلتلوش خدمات كتير يعنى حتى ممكن لما تروح تلاقى مغلق لسه هو فى جبل رملى صغير كدة جميل اوى فى اللعب وخصوصا لو معاك أطفال هتلاقيهم نازلين بيتدألجوا من عليه ..
والافضل يكون معاك أكلك وشربك ( بس لو سمحت متسيبش حاجة مكانك ) وفى نقطة مهمه لو معاك ناس كبيرة فى السن متاخدهمش معاك لان المنطقة الرمليه قبل الشاطئ كبيرة جدا تصل لكيلو وأكيد مش هيقدروا يمشوا المسافة دى
وممكن كمان تسأل على كهف الملح ودى حاجة لسه فاتحة جديد أكثر من 155 طن ملح من أكبر كهوف الملح اللي من صنع الانسان من حيث المساحه ويعتبر من افضل وسائل العلاج الحديث من استخراج الطاقه السلبيه والضغوط النفسيه و حساسيه الصدر والجيوب الانفيه والغده الدرقيه .
مركز للاستشفاء والاستجمام يعتمد على استخدام المادة الخام الملحية التى تحتوى على العديد من العناصر الطبيعية مثل الصوديوم واليود والحديد و الماغنسيوم. علي كورنيش البوسيت
التمشية ع الكورنيش بقى تحلى مع جيلاتي عزه ولب من عند النصر ( بس خللى معاك كيس ومترميش حاجة فى الارض ) وكمان ممكن تستنى لوقت الفجر كدة وتبتدوا تركبوا عجل
التين البرشومى دة تلقائيا هتلاقى نفسك يوميا بتشترى 2 كيلو ويخلصوا فى قعدة بليل بتاعت البلكونة دى .. وفى حوار بقى أنت ممكن تهرب من التين اللى لونة أخضر أحنا بنقولك لأ ده لو لقيتة كانك لقيت كنز أشترية بأى تمن ..
وفى كمان البطيخ الصحراوى ودة الاغلب هتقابله صدفة مع الناس اللى بتلف بالعربيات
فى سوق أسمه شارع عمر المختار جنب شارع الاسكندريه وعنب الأسود عنب براني دة لازم هتجيب منه بلح طرى هو مش عجوه هو أسمه بلح طرى
فى شاى أسمه أنور على دور عليه وهاته وكمان هات مخزون يكفيك لما ترجع وصدقونا مش هتندمو

تعليقات

المشاركات الشائعة